Acts 20

Pol Gat Pas Uto Masadonia La Grik

1Melemu at leedak gara xap pam, Pol ga xup bubua ka luvuttadi nuunu, la ni ga vaase loklok tooro rinedi la diga xaduk aonon i. La ni ga on basinge nedi la gat pas uto Masadonia. 2Ni gat pas to xeneng ap mo loxot la ni ga vaase loklok tooro ri limixin nuunu mi levelinga buaang. La melemu ni gat pas uto Grik. 3Ni ga nemen go ga at lavantun gaaling. Ga se ni ga gagas kusu ri mu lavattaaxup uto Siria, ni ga long lenger i do leme Judaia mo diga paase alii ri sev i; kuren la ni ga doma li i xusu namlong kantubu at lenep silok Masadonia. 4Sopata, nitna ne Pairas boro Beria, gat pas eburu min; la ne Aristakas la ne Sekandas boro Tesalonia; Gaius boro Debi; Timoti; la ne Tikikas la ne Tropimas boro at lenep silok Asia. 5Digamgo rinama la diga ngangais tinama ro Troas. 6Maga sen kaxat boro Pilipai melemu at lara leluxa laasen teren Lovovolo Pe; la melemu at lavalimo aleng maga vosiga di ro Troas, mo go maga nemen eburu midi at lavanuti aleng.

7At laaleng avot ap mo luik ga ukantinao maga vot buru ri lok katling laanan kaala at ne Iesu. Pol ga vaase ri limixin, la ni ga vavang babaalom se at laxanimin tubu mila ni ga lok do naba onon ap mo laaleng melemu. 8Buaang levenbabao ga nemen to vana ap mo loogu nema magak lok teren. 9Lara laau radi laasen teren ne Iutikas, gat kis to at loxon go lixilik; Pol ga vaase aleng la lemeren ne Iutikas ga unga aleng tinotno, se ni ga unga met, ni ga subu si boro vana xa ap mo loogu babaalom upana, la ukopok ti laxangka. Diga ranga axatu i, ga lavanga met ta. 10Ketla ne Pol ga vas si ukopok la ga subu pavaa i la ga ot kongkodan ka i la ni ga lok tidi, “Nemen mita bulu, neni mo i rooro mene la kopmen na met!” 11Melemu digamlong upana ap mo loogu la diga lok laanan kaala. La ne Pol ga vaase babaalom tidi se at laxangking ga losu maxantamak suubu, la ni ga on basinge di. 12Diga lok ka mo laau radi uto xolonu, la lebelen di gak lox atnaasan aleng mila ni goxo met.

13La nema maga vas kaxat me go uto at lavattaaxup la maga sen kaxat uto Asos kusu manaba xas ka ne Pol upana ri lavattaaxup. Ni ga tong i rinama do manabak lok ngais i go, mila ni gat pas mene ugo. 14La ni ga ekip tangarang minama ro Asos, la maga xas ka i upana at lavattaaxup la maga sen kaxat uto Matilini. 15Maga sen kaxat me go la maga rupot to saparap losoxan Kios ap mo laaleng petpes. Melemu at lara laaleng bok nga, maga sesen uto saparap losoxan Samos, la ap mo manga lara laaleng petpes maga rupot to Mailitas. 16Pol ga doxoma i do ni naba sen polo go Epesas, kusu ni noxo nemen abao ro at loxot Asia. Ni gak lok soso xusu ni naba rupot to Jerusalem, edompo mi laaleng ti lok katling la Pentikos.

Pol Ga On Basinge Limixin Nuunu Boro Epesas

17Pol ga riki lara laradi mi levelinga boro Mailitas uto Epesas, ga sing loxongkulao silok at lotu xusu dina ekip tangarang min. 18Diga vot posiga i la ni ga lok tinedi, “Miklen i do luruptuvuk tarak ga lox avukat ap mo levenaleng nia aga nemen eburu minemi, ga vaxaru ka i at laaleng nia aga rupot de at lenep Asia. 19Mi langsangan loklok ngangao la lanteng; aga lok leven gugu rak kerekngan lasaxaruki at ne Moroa, la aga ekip tangarang mi levenmumuat at leme Judaia diga lok li i rak. 20Mikleklen i do nia a goxo lipe tekolinga ri lok tooro nemi limixin; ketla nia agak lox ase nimi ro at lengkot potpot buru la to at leventaugu atnimi. 21Ti leme Judaia la limixin kopmen di me Judaia bok aga vaase lolos tinedi do dina leeng basinge laxakapmek atnedi, la dina vot parap ne Moroa, la dina nuunu at Leeme Silok ne Iesu.

22La ananga nia a ronga res at Loroonan Kaala, kusu anat pas uto Jerusalem; la nia axoklen i do lavanga salai naba rupot saparav ia go. 23Nia akleklen i do at laramenemen axap Loroonan Kaala ik lok tia dola limixin diba lok li ia at loogu xokoxo la aba xip laxanmumuat aleng. 24Ketla nia a lok do lorooro rak i lok ngan ta do lavanga gamasa mun tia; nia a vara mun i do ana lox axap lavatpas tarak la ana lox axap lugugu at Leeme Silok ne Iesu ga raba ia min; mo lugugu ri tong asu Lagale Lavavang mumu letaba nabalamu at ne Moroa.

25Agarat pas tangtagap pam kantubu atnimi, aga tong asu langas ti Linintoo at ne Moroa. La na a tong tuturun i rinimi; aklen i do kopmen tara atnimi noxo ven bok ba ia. 26Kuren la a tong tuturun i rinimi na lingina; mo do tara atnimi na ronga abulubun levelinga at ne Moroa, ni nabap kip lumumuat teren. Nia xopmen lavasuun teren, 27mila nia a goxo lipe tempanga ketla aga tong asu lempanga axap ne Moroa ga lok do na lox i at lorooro atnimi. 28Mina lok tatao avukat nemi la mina lok tatao nedi bok limixin, Loroonan Kaala gara lok li vam nedi maxopok at loklok tatao atnimi. Mina lok ngan luvuttadi loklok tatao sipsip kantubu at limixin at ne Moroa, no ni ga lok li di do ateren axa mumu lanmet at ne nitna. 29Aklen i do melemu at loxonaleng nia ana onon, limixin kapmek diba rupot kantubu atnimi, diba lok ngan lubungman atat la diba lok kapmek lunuunu at lentaba atnimi. 30Laaleng move naba rupot la lentaba atnimi diba ba gili levelinga ruturun kusu ri sat ka limixin nuunu basinge ne Moroa. 31Mina lok tatao avukat nemi. Mina doma bilong ti mo lavantun maares nenia aga paase lolos tinemi axap at levenaleng kangking la kanimin, la agang teng mu nimi.

32La ana nia a lok li nimi maxopok at loklok tatao at ne Moroa la levelinga mumu letaba nabalamu ren ba lok tooro nimi. Neni xa i epovo ri lox alolos lunuunu atnimi la na raba nemi mi lapnovos no ni i gagas li i ri limixin teren. 33Nia a goxom doma mu tempilas kopla tempanga singsiga atnimi. 34Nemi xa miklen i do aga gugu mi na lukngak la aga lox epovo ka lempanga, nema mi larapen tangas tarak magak pakes tin. 35At lempanga axap nia aga lox i, aga lox ase nimi do mina lolos kusu mina lok tooro mo limixin banbalo. Mina lox i xuren mila ne Iesu ga lok keretna, ‘I lox avukat do tara i lok kaka levempanga, ketla i lox avukat aleng do tara na raba levempanga ri laradi vetpes.”

36Pol ga vaase axap la ni ga xis tiktikbu mi luvatgulom teren eburu minedi axap limixin la ni ga sing. 37Nedi axap digang teng aleng la diga votor i la digat nes i. 38Diga lok bukbulu aleng at levelinga ni ga tong i do di noxo ven bok ba i. La diga emu min uto at lavattaaxup.